१९ चैत्र, बाँके । गत शुक्रबार काठमाडौँको तिनकुनेमा राजावादीको आन्दोलनका क्रममा पत्रकारको हत्या, कुटपिट, दुर्व्यवहार तथा सञ्चार गृहमा गरिएको आगजनी, तोडफोड र ढुंगामुढा विरुद्ध आन्दोलित पत्रकारहरु आज सरकारलाई ज्ञापन बुझाएका छन् ।
नेपाल पत्रकार महासंघ केन्द्रीय समितीको आब्हानमा देशभरका पत्रकार आन्दोलित भइरहेका बेला बाँकेमा पनि पत्रकारहरुले प्रमुख जिल्ला अधिकारी मार्फत सरकारलाई ज्ञापनपत्र बुझाएका हुन ।
Advertisement
नेपाल पत्रकार महासंघ बाँके जिल्ला शाखाको नेतृत्व तथा शाखा अध्यक्ष नविन गिरीको अगुवाईमा मंगलबार दिउँसो सहायक प्रमुख जिल्ला अधिकारी खडानन्द खत्रीलाई ज्ञापन पत्र बुझाएको हो ।
काठमाडौँमा गत चैत १५ गते राजावादीहरुको हिंसात्मक आन्दोलनको क्रममा अराजक समूहले सञ्चारमाध्यम र सञ्चारकर्मीलाई निसाना बनाएर भिडियो खिच्ने क्रममा एभिन्यूज टेलिभिजनका पत्रकार रजकको आगलागीमा परेर ज्यान गएको, अन्नपूर्ण पोष्ट दैनिकको कार्यालयमा आगो लगाउनुका साथै ढुंगामुढा गरेर क्षति पुर्याइएको, कान्तिपुर टेलिभिजनको भवनमा ढुंगामुढा गरी क्षति पुर्याइएको, हिमालयन टेलिभिजनको सवारीसाधनमा तोडफोड, पत्रकार दिनेश गौतमको खुट्टा भाचिएको, फोटो पत्रकार निरज तामाङको क्यामेरा हराएको घटना प्रति नेपाल पत्रकार महासंघले गम्भिर रहेको जनाएको छ ।
Advertisement
उक्त घटनामा ज्यान गुमाएका पत्रकारको हत्याबारे गहिरो अनुसन्धान गरी हत्यामा संलग्न सबैलाई फौजदारी अभियोगमा कारवाही गर्ने तथा उनको परिवार क्षतिपुर्ती दिन, सञ्चारमाध्यम र सञ्चारकर्मी माथि आक्रमण गर्ने सबै कानूनी कटघरामा ल्याउन तथा क्षति पुर्याइएका सञ्चारगृह र सञ्चारकर्मीलाई क्षतिपुर्तीका साथै पत्रकारको उपचारको प्रबन्ध मिलाउन महासंघको माग छ ।
उक्त मागहरु सात दिनभित्र पूरा गर्न सरकारलाई पत्रकार महासंघले अल्टिमेटम दिएको छ । माग सम्बोधन नभएको खण्डमा नेपाल पत्रकार महासंघ चरणवद्ध आन्दोलनमा उत्रिने चेतावनी समेत दिएको छ ।
Advertisement
ज्ञापनपत्र बुझ्दै सहायक प्रमुख जिल्ला अधिकारी खत्रीले उक्त ज्ञापनपत्र तत्काल प्रधानमन्त्री कार्यलय लगायत सम्बन्धित कार्यालयमा पठाइने प्रतिवद्धता जनाएका थिए ।
शाखा अध्यक्ष गिरीको नेतृत्वमा महासंघ लुम्विनी प्रदेशका अध्यक्ष शुक्रऋषि चौलागाइँ, महासंघ बाँकेका पूर्व अध्यक्षहरु नीरज गौतम, झलक गैरे, नेपाल प्रेस युनियन बाँकेका अध्यक्ष प्रियास्मृति ढकाल, प्रेस चौतारी बाँकेका अध्यक्ष कमल डाँगी लगायत विभिन्न सञ्चारगृहमा कार्यरत क्रियाशिल पत्रकारहरुको उपस्थिति रहेको थियो ।
Advertisement
टिप्पणीहरू